碧咸，你好嘢！

碧咸雖然係萬人迷，但亦因為咁經常都會聽到有人話佢得個樣，冇實力，但喺我心目中佢絕對係一個巨星，唔係因為佢特別好波，而係佢對足球嘅嗰股熱誠！
記得98年世界杯，佢一時衝動領紅牌，間接令英格蘭出局，回國後受盡千夫所指，但佢並無因此而氣餒，反而專心做好自己本份，終於99年幫曼聯贏到歷史性嘅三冠王！今年亦係一樣，世界杯過後被球會，國家隊放棄，其實以佢嘅名氣，大可好似朗拿度咁，Hea住踢多幾年就收山，但係佢冇放棄，仍然好努力保持自己嘅狀態，當季尾再次得到出場機會時，就發揮出自己最高水準，最後唔單止再獲國家隊重召，同時亦為皇馬奇蹟奪得聯賽冠軍，實在令我非常佩服。
論球技，碧咸唔算天才橫溢，聽聞佢嘅招牌罸球同七旋斬都係靠佢自己喺正規操練完結之後，自發加操苦練得嚟，佢最終得到成功我都覺得好開心，證明一個人努力真係有回報。碧咸，你好嘢！

近期自己有好多嘢都好似唔係好順利，雖然自己真係好努力，但似乎都未有咩回報，又唔知有咩方法可以做得更好，其實好多次我都想放棄，碧咸嘅成功，的確俾到我好大嘅鼓舞，但係究竟我嘅春天幾時先會嚟到呢...